We czwortek rano żech stanyła, pozbiyrała wiecy a szła. Wezłach se colectivo ku szkole a dali żech szła pieszo, bo to była inszo trasa. Wszyscy se na mnie dziwnie dziwali, bo z batohym, taszkóm a spacakym, tam moc ludzi nie chodziło. Właściwie żech wiedziała yny tak przibliżnie kaj je terminal, ale stejnie żech tam bez problemu trefiła. W aucie uż tam czakoł Lenny, potym przijechoł Sampo, Amanda. Scuka my mieli 9:30 a jasne że tam nie byli, puźni przijechali Alex, Peik, Margie a Berengere. Tak zamiast iść nakupić do Jumba, my uż szli do busu. Bus JM uż mieli owierzóny, wiecy my ciepli do kufru a szli my se siednyć. Taki luxusni busy, jechali my z początku aż na konecznóm! :D Siedziałach z Lennym, ale stejnie wszyscy usli ze sluchatkami w uszach. Nimiałach żodnóm swacze a byłach celkem głodno, tak żech zjadła jedyne suszenki coch miała. Na dworcu ve Valparaísu my czakali, zagadnył nas jaksi typek, kiery był na rok w ameryce, kupe ludzi z Chile wyjyżdżo do USA, kónecznie po nas prziszła siostrzynica od Amandy a szło se. Jaksimi uliczkami a placym na kierym było kupa stolików a Starzicy tam grali karty, troche dali na chodniku były porozkłodane wiecy a sprzedowali, co naszli dóma (oblyczka, kable, wiecy z kuchyni, wszystko co was napadnie). Doszlimy do apartmanu, niby od tatów Amandy, ale miyszkała tam siostrzynica. Fórt nie wiym czy to był hotel albo jaksi super luxusni panelak, rozhodnie tam Ci ludzie nie miyszkajóm cały rok. W 3.piyntrze był wenkowni bazen a my "miyszkali" w 10.piyntrze. Nasklodalimy se do 2+kk, było nas 8+2 zdejszi. Troche my to przeorganizowali, porozkłodali łóżka a kónecznie wszyscy głodni my szli na pole. Najeść se a pozwiedzać to miasto. Jechali my trolejbusym na namiesti, tam żech to znała, tak żech ich wezła do obchodiaku na fastfood. Pojedlimy taki mega bagety, zaszlimy do Starbugs (moja piyrwszo nawsztiewa tego drogigo pieróństwa) a siedlimy se na pole. Jaksi 2 niymki ku nóm prziszły, zaczły nabidować jaksi aktiwity a blabla, letaczki a czus. Selfie ze strażóm a walilimy do przistawu. W porcie było pełno łódek :D, oczywiście nas lakali, tak my podpadli za 2000CLP każdy. Za babke na 20 minut to było jak sen. Sice piyrwsze żech miała troche strach z tej kocabki, ale dobre dostalimy westy! Widzieli my foki, była panorama na miasto, aji wojenski łodzie my mieli na dosah. Wojocy mawali aji na czlunach kole jeździli, tak dobre fociak mi nie zneszkodnili. Potym ich ułowił torg, tak asi godzine my oglóndali a kupowali capiny, bo to je yny 1 euro!!! Móm pore widokówek a ganc starczy. Kónecznie my se pumału dostali na góre do uliczek, szlimy po czuchu. Potym żech to poznała, tak my szli tam kaj jo, ale potym zaś odboczyli. W jaksi zataczce syncy zrobili scene, że to je strasznie znóme, że to miejsce było na kanalu GoPro a że tam tyn cyklista był 3 metry wysoko... Tak my se tam focili, potym my wubec nie wiedzieli kaj, tak żech se pytała ludzi aż nas oslowiła tako babka, kiero wiedziała asi wszystko a umiała kupe jynzyków a oczywidnie nie była rodnóm chilankóm. Miała suprowy hiszpański, angielski, nimiecki a nie wiym co eszcze znała. Doporucziła nóm dwie cesty, a tak my szli. Ganc my se wrócili, ale naszli my to. Milion fotek a szlimy pumału zaś na dół, pokozałach im fortepianowe schody a skóńczylimy zaś na jedzyniu. Tym razym miynszo przekąska a zaś zpatki trolejbusym na apartament. Eszcze my skoczyli do Lideru nakupić na wieczór a człapalimy na wrch. Przewlyklimy se, pospoczywali, zapli muzyke, dziobali co było, pokecali, a potym nóm siostrzynica nabidła, że mogymy na strzeche. Wyjechało se do 26 piyntra a jedny schody wyszłapało. Była noc a całe miasto świyciło, było to moc piekne. Mieli my muzyke, zaczli my tańczyć a focić, wszyscy z tego byli mimo. Było to fakt jak sen!! Muzyka, koledzy, kajsi daleko na strzesze luxusnigo hotelu, panorama na cale miasto aji ocean, na dole świycił bazen a wszystko to było realne, nie byłach w żodnym filmu. Wiynkszość wymarzła a stahła se zaś do pokoju, ale na wrchu my bali fakt dłóógo. Padła decyzja, że idymy na dyskoteke, bralimy yny to, co było fakt niezbyndne a to my eszcze dobrze schowali. Na każdym kroku nas upozorniowali, że se tu kradzie, tak trza dować pozor.
Na piyrwszej dyskotece my nie byli uspieszni, ale uż do drugigo lokalu nas puścili zadarmo. Taki pub z DJ, pełno chłopów. Przeciślimy se na drugóm stróne, kaj było miyni ludzi, troche porozglóndali, no a nie zbywało niż zacznyć tańcować... Jedna grupka szła na wychodek, my zustali. Wszyndzi se chodziło w grupce. Przesunylimy se na wrch, tam uż skoro nigdo nie był. Cosi se rzeszyło, ale nie wiym co. Puźni mi to doszło, jak my wszyscy se przeciskali kole baru a wylyźli, tak Alex dostoł zdupa, że szeł na pole. Wyrzeszili se to a padła dalszo decyzja. Połówka szła zpatki na apartament a połówka szła zaś na dyskoteke. Oczywiście żech szła na pokój, tako przekąska przi jaksim filmie brzmiała lepi!! Z B my uwarziły, co my naszły, bo sklepy były pozawiyrane a mieli my głód. Jak prziszła, tak nóm oczywiście dała nauczke, ale co uż. Celkem jóm chapiym, ona by nas też miała, bo se nas ani nie posłechła. Każdopadnie my porzeszili problemy a szło se spać. W każdym łóżku były dwie osoby. Spało se źle, ale lepsze niż nic (uż wiym jaki to je, jak wujkowi spaduje rynka z gaucza-nieprzijymne). Rano my poskludzali, pobalili, nakupili, zaszłach na bazen popływać, pojeść, podziynkować a uż my walili.
Z wszystkimi tymi wiecami my zaś szli przez tyn rynek na kierym wszyscy sprzedowali różne rzeczy, starzicy z kartami, a potym uliczkami, przez różne targowiska z owocami a jarzynami. Pełno aut a ludzi aż my se kónecznie dostali na głównóm ku wybrzeżu. Tam my chycili bus - micro a walili my do Vina del Mar. Cało ta cesta przez tyn wóniawy a głośny torg, jak my se ciśli a tyn bus, kiery kierowoł jaksi znany tubylec, mi prziszła jak z cestopisu. Siedzielimy w małym busie wiecy naskłodane wszyndzi kaj było miejsce, kierowca walił o 106, na ceście było pełno dziur tak to skokało, wiecy se bulały, wiater nóm fuczoł do włosów, pełno krawalu od motora a eszcze jak my widzieli tóm zataczkowóm ceste, a jak w zataczce przejyżdzo z 3. do 1. pruhu a wymijo wszystki ty auta, co jadóm rozhodnie pumali... A my wszyscy wyśmioci, bez problemów jadymy kajsi hledać przygode, jaksi wiecy mómy, nic nóm nie chybi, stejnak my sóm wszyscy moc daleko od naszych chałp a rodzin. To był taki moment euforii, że jak uż, tak uż a mieli by my se to użyć na pełnego, ni autami dupy wozić, trza zasmakować to oprawdzicki podróżowani.
Žádné komentáře:
Okomentovat