Uż to snad przeszło a bydzie od wszystkich trzyńsiyń pokój. Trzepało se to tu asi każdy dziyń, nikiedy aji czynści, ale yny taki "temblory". Wyjaśniym wóm różnice:
terremoto - 6,5 < w skali Richtera, temblor - 6,4 > w skali Richtera
Celkem mnie to budziło w nocy, tak móm nadzieje, że je kóniec!
Tyntu poniedziałek mnie asi o 4 rano obudziło jedno taki dość silne a dłóóógi. Asi bych dali spała, ale cało rodzina stepowała przed wiyrzami a wrzeszczała: Aniaaa, Aniaa. Tak troche z niechynciom żech wylazła z mojigo wygrzotego łóżka, a celkem zbytecznie, bo niż tata odblokowoł alarm od dwiyrzi, wszystko przestało. We szkole też było asi jedno, moc uż nie wiym. W każzdym wypadku my mieli we szkole ewakuacje, cało szkoła była ewakuowano. Wszystki klasy se uszeregowały na podwórku w kolumnach a potym nóm nasz principal dowoł wskazówki, co wylepszyć albo nie robić, a tak. Było to yny ćwiczne, także spoko, spisz my yny wymarzli na polu a szli zpatki do klas.
21.9. piyrwszy dziyń wiosny
Dycki żech miała związanóm wiosne z urodzinami. Tyntu rok uż móm drugóm wiosne, ale na polu to tak nie wyglóndo. Pogoda se zmiyniła, je chłódno, fórt padze a zogroda wyglondo spisz jak jezioro. Po każdym deszczu se zatopi, a potym asi tydziyń wysycho. Aktualnie dzisio cały dziyń leje.
Gala Folclórica
Trzynsiyni nóm ukóńczyło naszóm akcje we środe a nie wszystki klasy ścigły wystąpić, tak se to powtórzymy teraz w piątek. Piyrwszo grupa Samba Caporal pojedzie asi w połednie do Putaenda wystąpić na jaksi festiwal a drugo grupa wystympuje wieczór na gali. Jo uż ale wystympować nie bydym, bo jutro popołedniu jadym na spotkani 25.-27.9. mómy Rotex weekend ve Vina del Mar jako w pobliski wiosce. Wiynkszość gringów z LA jechało uż dzisio, ale jo jadym ze Sampym, mamóm a segróm aż jutro.
Szkoła
W poniedziałek my byli po wakacjach, tak głównym tematym było teremotto a poranny temblor :D Na angielskim nóm z Lennard nauczycielka zaś odsunyła nasze prezentacje (były zadane na 3 tydnie wstecz a posunyła to o dalsze 2 tydnie). Jech tu uż miesiónc a fórt nimóm żodyn ART, tak se dycki mogym bawić z dzieckami. Byłach se podziwać na plastyke, celkem zabawne, robióm obrazki z roztopiónych gumisiów. Właściwie na lekcjach nic nie robiym yny na angielskim, bo to my sóm skoro jako bóstwa, co umió po angielsku a na language też dycki mómy jaksi zadania. Dzisio żech trzeba pisała zadani kontrolne w hiszpańskim na temat moje życie w piynciu akapitach my z Lennardym mieli opisać jaksich 5 momentów. Trzeba uznać, że nas klasowy pan Harry nas też celkem wcióngo do lekcji :)
Dzisio był fajny dziyń! Do szkoły se nie szło w uniformach, ale normalnie. To mi kupa przipómniało nasze szkoły, strasznie fajny pocit. Ale też my mieli takóm akcje, że każdy cosi prziniesie, dlo ludzi poszkodowanych trzynsiyniym. Naszo klasa nosiła szampon, coż se godzi a nikogo jedyn szapon nie zabije. Jak se weźniecie, że każdy cosi prziniesie, tak tego se nazbiyro kupa! :) Moc nie wiym czymu, ale asi uż to była moc nuda na mojich kolegów, tak my mieli takóm rychłóm spontanicznóm akcje "obrocono klasa". Niż prziszeł nauczyciel tak my obrócili wszystki ławki o 180° a aji nauczycielskóm katedre se przeniósło aji kosz, wszystko było zwierciadłowo (akurak projektor a dwiyrze zustały). Jak profe prziszeł do klasy, tak wszyscy spali. Troche se zaraził a "nasztwoł", zaroz zacznył ziszczować, gdo wymyśloł: Toś wymyśloł ty Juanito? Albo ty Gringa (pytoł se każdego gdo dzwignył głowe), nakóniec to schytała chudok Montse. Nejlepsze je, że jak se profe nie pamiynto miano, tak se cosi wymyśli trzeba Augustina albo jaksi pieróństwa! :D
A jako bonus żech se dzisio dowiedziała, że jutro nie muszym iść do szkoły, stejnie nie wystympujym a nic bych tam nie robiła, tak se aspóń wyspiym przed narocznym wikendym. :)
Prziszeł mi oficjalny email od Konzula z Czeski Ambasady w Chile. Porządnie nie wiym, jak se dostoł ku moimu emailu, ale jeżech rada. Pisoł cosi we smyslu, jeśli chcym być w kontaktu z czeskóm komunitów w Chile albo z ambasadóm, że se mogym kiedyoklwiek ozwać a jaksi pytania: Jak dłógo tu bydym, a kaj studujym, a czy żech była na PDI. Tak żech je moc rad, że se tu o mnie staro tela ludzi. :) Aji uż żech była pozwano na piyrwszóm akcje, kaj bydzie weprzo knedlo zelo, ale niestety bydym zrowna prycz.
Voley
Wczora żech zaś była grać woleyball a prziszły tydziyń snad mómy zawody, tak uwidzym no. Wszyscy tu grajóm strasznie dobrze aziściłach, że to je yny tym, że to tu umióm dobrze nauczyć. Wierzym, że se tu wylepszym abych wóm to potym natrziła :P albo se wóm dorównała.
Móm nadzieje, że se tu dostanym do jaksigo zespołu Mama mi to obiecała, ale narazie załatwiła teatr, tak se tam pudym dziepro podziwać ;)
Žádné komentáře:
Okomentovat